ກອງປະຊຸມໄດ້ຮັບຮອງເອົາຄວາມຄືບໜ້າ ແລະ ຜົນສຳເລັດຂອງຂໍ້ລິເລີ່ມສຳຄັນລະດັບພາກພື້ນຫຼາຍດ້ານ ເປັນຕົ້ນແມ່ນ:

• ການຊຸກຍູ້ຄູ່ມືການອອກໃບຮັບຮອງການຝາກຫຼັກຊັບ, ແຜນການສຳລັບການຈົດທະບຽນຂ້າມຊາຍແດນ ແລະ ການນຳໃຊ້ປັນຍາປະດິດ (AI) ຢ່າງມີຄວາມຮັບຜິດຊອບໃນຕະຫຼາດທຶນດິຈິຕອນ.
• ການເຫັນດີນຳໃຊ້ມາດຕະຖານການເປີດເຜີຍຂໍ້ມູນຄວາມຍືນຍົງສາກົນ (ISSB), ການຕໍ່ອາຍຸອະນຸສັນຍາຮ່ວມກັບອົງກອນ IFRS, ການພັດທະນາຫຼັກເກນການຈັດປະເພດອາຊຽນ (ASEAN Taxonomy) ແລະ ການຊຸກຍູ້ຕະຫຼາດກາກບອນ.
• ການສ້າງຕັ້ງຫ້ອງການ ACMF ຢ່າງເປັນທາງການທີ່ ສຳນັກງານໃຫຍ່ທະນາຄານພັດທະນາອາຊີ ເພື່ອຮັບປະກັນຄວາມຕໍ່ເນື່ອງ ແລະ ເປັນສູນກາງອຳນວຍຄວາມສະດວກໃຫ້ແກ່ປະເທດສະມາຊິກ.

ສຳລັບ ສປປ ລາວ, ກອງປະຊຸມໄດ້ຕີລາຄາສູງຕໍ່ຄວາມພະຍາຍາມໃນການຍົກລະດັບວຽກງານການຄຸ້ມຄອງບໍລິຫານທຸລະກິດ ໂດຍສະເພາະແມ່ນການກະກຽມຄວາມພ້ອມໃນການເຂົ້າຮ່ວມການຈັດຕັ້ງປະຕິບັດການຄຸ້ມຄອງບໍລິຫານຂອງບໍລິສັດຈົດທະບຽນໃນອາຊຽນ (ASEAN Corporate Governance Scorecard - ACGS). ພ້ອມດຽວກັນນີ້, ສຄຄຊ ຍັງໄດ້ມີສ່ວນຮ່ວມປະກອບຄຳເຫັນຢ່າງຕັ້ງໜ້າໃນທຸກຂໍ້ລິເລີ່ມສຳຄັນລະດັບພາກພື້ນ ໂດຍສະເພາະຢ່າງຍິ່ງໃນວຽກງານການເງິນແບບຍືນຍົງ ເພື່ອຮັບປະກັນໃຫ້ການພັດທະນາຕະຫຼາດທຶນພາຍໃນປະເທດ ມີຄວາມສອດຄ່ອງກັບທິດທາງການເຊື່ອມໂຍງຂອງພາກພື້ນ.