ໃນຕອນເຊົ້າຂອງວັນທີ 25 ຕຸລາ 2024, ສໍານັກງານຄະນະກໍາມະການຄຸ້ມຄອງຫຼັກຊັບ (ສຄຄຊ) ຮ່ວມກັບ ກົມຄຸ້ມຄອງວິສາຫະກິດລັດລົງທຶນ ແລະ ການປະກັນໄພ, ກະຊວງການເງິນ ໄດ້ຈັດກອງປະຊຸມເຜີຍແຜ່ວຽກງານຫຼັກຊັບໃຫ້ແກ່ບໍລິສັດປະກັນໄພ, ທີ່ຫ້ອງປະຊຸມໃຫຍ່ຊັ້ນ 6 ສໍານັກງານ ຄຄຊ,ໂດຍການເປັນປະທານຂອງ ທ່ານ ສຽວສະຫວາດ ທີລະກຸນ, ຮອງຫົວໜ້າ ສໍານັກງານ ຄຄຊ ແລະ ຜູ້ເຂົ້າຮ່ວມຈາກຂະແໜງການປະກັນໄພຈໍານວນ 25 ບໍລິສັດ, ພ້ອມດຽວກັນນີ້, ກໍຍັງໄດ້ຮັບການຮ່ວມມື ແລະ ປະກອບສ່ວນບັນຍາຍຈາກສຳນັກງານ ຄຄຊ, ຕະຫຼາດຫຼັກຊັບລາວ, ບໍລິສັດຫຼັກຊັບ ທຄຕລ-ກທ, ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ຈຸດປະສົງໃນການຈັດກອງປະຊຸມເຜີຍແຜ່ຄັ້ງນີ້ ແມ່ນເພື່ອສືບຕໍ່ຂະຫຍາຍການຮ່ວມມື ແລະການເຂົ້າມາມີສ່ວນຮ່ວມຂອງພາກສ່ວນປະກັນໄພ , ໂດຍແນ່ໃສ່ຖານຜູ້ລົງທຶນພາຍໃນປະເພດສະຖາບັນໃຫ້ເຂົ້າມາມີສ່ວນຮ່ວມໃນການລົງທຶນຊະແໜງຫຼັກຊັບໃຫ້ຫຼາຍຂຶ້ນ, ຊຶ່ງຈະແນໃສ່ການໃຫ້ຄວາມຮູ້ ແລະ ສ້າງຄວາມເຂົ້າໃຈກ່ຽວກັບວຽກງານໃນຂົງເຂດຕະຫຼາດທຶນ ເປັນຕົ້ນແມ່ນຜົນປະໂຫຍດທີ່ຈະໄດ້ຮັບຈາກການຈົດທະບຽນ, ຂັ້ນຕອນ ແລະ ເງື່ອນໄຂຕ່າງໆໃນການອອກຈໍາໜ່າຍຮຸ້ນ ແລະ ຮຸ້ນກູ້ ລວມໄປເຖິງບັນດາຂະບວນການຊື້ຂາຍຫຼັກຊັບ ເພື່ອເປັນແນວທາງໃຫ້ແກ່ບຸກຄົນ, ນິຕິບຸກຄົນ ຫຼື ພາກສ່ວນອົງກອນທີ່ສົນໃຈລົງທຶນໃນຫຼັກຊັບ , ພ້ອມດຽວກັນກໍເພື່ອເປັນການສ້າງຂະບວນການໃນໄລຍະກະກຽມກອງປະຊຸມໃຫ່ຍຂອງທັງສອງພາກສ່ວນທີ່ຈະມາເຖິງໃນໄວໆນີ້.