ປະຫວັດຄວາມເປັນມາຂອງ ຄຄຊ
ພາຍຫຼັງທີ່ລັດຖະບານແຫ່ງ ສປປລ ໄດ້ກໍານົດທິດທາງປ່ຽນແປງໃໝ່ຢ່າງຮອບດ້ານ ດ້ວຍການໝູນໃຊ້ກົນໄກເສດຖະກິດຕະຫຼາດເຂົ້າໃນການພັດທະນາເສດຖະກິດ ແລະ ສ້າງສັງຄົມນິຍົມ ໃນປີ 1986, ຂະແໜງການເງິນຂອງ ສປປລ ກໍໄດ້ຮັບ ການພັດທະນາມາເປັນກ້າວໆ ໂດຍສະເພາະແມ່ນການພັດທະນາວຽກງານການທະນາຄານ. ລະບົບການທະນາຄານໄດ້ຮັບການປັບປຸງ ໂດຍແຍກພາລະບົດບາດໜ້າທີ່ຂອງທະນາຄານກາງ (ທະນາຄານແຫ່ງ ສປປ ລາວ) ອອກຈາກບົດບາດໜ້າທີ່ຂອງທະນາຄານທຸລະກິດ. ຕະຫຼອດໄລຍະ 20 ປີ (1986-2006), ທະນາຄານທຸລະກິດໄດ້ມີການຂະຫຍາຍຕົວທາງດ້ານປະລິມານ ແລະ ຄຸນນະພາບ ສາມາດລະດົມເງິນຝາກຈາກສັງຄົມໄດ້ຢ່າງທົ່ວເຖີງ ແລະ ສະໜອງສີນເຊື່ອໃຫ້ແກ່ການຜະລິດ ແລະ ບໍລິການໃນທຸກຂົງເຂດ-ຂະແໜງການ ແຕ່ການຂະຫຍາຍຕົວດັ່ງກ່າວ ກໍບໍ່ທັນສາມາດຕອບສະໜອງໄດ້ຄວາມຮຽກຮ້ອງຕ້ອງການຂອງສັງຄົມ ເປັນຕົ້ນແມ່ນການລະດົມທຶນໄລຍະຍາວເປັນຈໍານວນຫຼາຍ ເພື່ອພັດທະນາອຸດສາຫະກໍາຂະໜາດໃຫຍ່. ດ້ວຍເຫດຜົນຄືດັ່ງກ່າວສົມທົບກັບບົດຮຽນທາງດ້ານທິດສະດີ ແລະ ພຶດຕິກຳຂອງສາກົນ, ພັກປະຊາຊົນປະຕິວັດລາວ ຈຶ່ງໄດ້ກໍານົດໃຫ້ສ້າງຕະຫຼາດພາຍໃນປະເທດໃຫ້ເປັນລະບົບຄົບຊຸດ ເພື່ອເປັນປັດໃຈຍູ້ການຜະລິດທຸລະກິດໃຫ້ຂະຫຍາຍຕົວຢ່າງມີຊີວິດຊີວາ ໃນມະຕິກອງປະຊຸມໃຫຍ່ຄັ້ງທີ VIII ຂອງຕົນ (ປີ 2006).
ອີງຕາມທິດທາງຂອງມະຕິກອງປະຊຸມໃຫຍ່ຄັ້ງທີ VIII ຂອງພັກ, ລັດຖະບານໄດ້ກຳນົດແຜນການສ້າງຕັ້ງຕະຫຼາດຫຼັກຊັບໃຫ້ປາກົດເປັນຈິງເຂົ້າໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII (2006-2010) ຊຶ່ງໃນເບື້ອງຕົ້ນ ໄດ້ມອບໝາຍໃຫ້ ທະນາຄານແຫ່ງ ສປປລ ເປັນເຈົ້າການສຶກສາຄົ້ນຄວ້າ, ກະກຽມຄວາມພ້ອມ ແລະ ເງື່ອນໄຂທີ່ຈໍາເປັນເບື້ອງຕົ້ນໃຫ້ແກ່ການເປີດຕະຫຼາດຫຼັກຊັບ. ຈາກນັ້ນ ທະນາຄານແຫ່ງ ສປປລ ກໍໄດ້ແຕ່ງຕັ້ງຄະນະຮັບຜິດຊອບຄົ້ນຄວ້າ ແລະ ຮ່າງດໍາລັດ ວ່າດ້ວຍຫຼັກຊັບ ແລະ ຕະຫຼາດຫຼັກຊັບ ຂື້ນໃນເດືອນ ຕຸລາ ປີ 2006. ພ້ອມດຽວກັນ ລັດຖະບານກໍ່ໄດ້ສົ່ງການນຳຂັ້ນສູງໄປຖອດຖອນບົດຮຽນໃນການສ້າງຕັ້ງຕະຫຼາດຫຼັກຊັບຢູ່ຕ່າງປະເທດເຊັ່ນ: ສສ ຫວຽດນາມ, ສ.ເກົາຫຼີ ແລະ ປະເທດໄທ.
ຍ້ອນການກະກຽມສ້າງຕັ້ງຕະຫຼາດຫຼັກຊັບເປັນວຽກທີ່ສໍາຄັນ ແລະ ຕິດພັນກັບຫຼາຍພາກສ່ວນ ລັດຖະບານຈຶ່ງໄດ້ຕົກລົງ ແຕ່ງຕັ້ງຄະນະຊີ້ນຳລວມໃນການສ້າງຕັ້ງຕະຫຼາດຫຼັກຊັບຂຶ້ນໃນເດືອນ ພະຈິກ ປີ 2007 ທີ່ປະກອບດ້ວຍຄະນະທັງໝົດ 5 ທ່ານ ແລະ ມີທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ ຜູ້ປະຈຳການລັດຖະບານເປັນປະທານ. ຫຼັງຈາກນັ້ນ ຄະນະຊີ້ນຳລວມ ກໍໄດ້ອອກຂໍ້ຕົກລົງແຕ່ງຕັ້ງຄະນະຮັບຜິດຊອບສ້າງຕັ້ງຕະຫຼາດຫຼັກຊັບຂື້ນ ເພື່ອເປັນເສນາທິການໃຫ້ແກ່ ຄະນະຊີ້ນໍາລວມ ໂດຍໃນເບື້ອງຕົ້ນໄດ້ປະກອບບຸກຄະລາກອນທັງໝົດ 10 ທ່ານ ຈາກທະນາຄານແຫ່ງ ສປປລ ເຂົ້າໃນທີມ ງານດັ່ງກ່າວ.
ໃນວັນທີ 25 ພຶດສະພາ 2009 ລັດຖະບານໄດ້ຕົກລົງແຕ່ງຕັ້ງ ຄະນະກຳມະການຄຸ້ມຄອງຫຼັກຊັບ ແລະ ຕະຫຼາດຫຼັກຊັບ ຂື້ນຕາມຂໍ້ຕົກລົງຂອງນາຍົກລັດຖະມົນຕີສະບັບເລກທີ: 051/ນຍ ເພື່ອປ່ຽນແທນຄະນະຊີ້ນໍາລວມໃນການສ້າງຕັ້ງຕະຫຼາດຫຼັກຊັບ.