ສຳນັກງານຄະນະກຳມະການຄຸ້ມຄອງຫຼັກຊັບ (ສຄຄຊ) ໃນນາມປະທານຄະນະກໍາມະການພັດທະນາຕະຫຼາດທຶນອາຊຽນ (ASEAN Capital Markets Forum: ACMF) ໃນປີ 2024 ໄດ້ຮ່ວມມືກັບທະນາຄານກາງສິງກະໂປ (Monetary Authority of Singapore: MAS), ຄະນະກໍາມະການມາດຕະຖານສາກົນດ້ານການລາຍງານການເງິນຍືນຍົງ (International Sustainability Standards Board: ISSB) ແລະ ທະນາຄານພັດທະນາອາຊີ (Asian Development Bank: ADB) ເພື່ອຈັດງານຝຶກອົບຮົມດ້ານວິຊາການຕິດພັນກັບມາດຕະຖານສາກົນດ້ານການລາຍງານການເງິນຍືນຍົງ (ACMF-ISSB Technical Training on the IFRS Sustainability Disclosure Standards: ISSB Standards) ໃຫ້ແກ່ບັນດາຜູ້ຄຸ້ມຄອງ ແລະ ບໍລິສັດທີ່ກະກຽມເຮັດບົດລາຍງານທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ ທີ່ນອນໃນປະເທດສະມາຊິກອາຊຽນ ໃນວັນທີ 23 ຕຸລາ 2024 ຢູ່ທີ່ ໂຮງແຮມແລນມາກ, ນະຄອນຫຼວງວຽງຈັນວຽງຈັນ, ສປປ ລາວ.

ງານຝຶກອົບຮົມດັ່ງກ່າວ ໄດ້ຈັດເປັນ 2 ພາກ ຄື: ພາກເຊົ້າ ສໍາລັບ ຜູ້ຄຸ້ມຄອງ ແລະ ພາກບ່າຍ ສໍາລັບ ບໍລິສັດທີ່ກະກຽມເຮັດບົດລາຍງານ. ຈຸດປະສົງ ແມ່ນເພື່ອສ້າງຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງດ້ານເທັກນິກວິຊາການກ່ຽວກັບ ISSB Standards ເປັນຕົ້ນແມ່ນ ການພັດທະນາມາດຕະຖານ ISSB, ການແນະນໍາການນໍາໃຊ້ ISSB Standards ແລະ ເຄື່ອງມືທີ່ຈໍາເປັນໃນການສ້າງບົດລາຍງານການເງິນຍືນຍົງ. ນອກນັ້ນ ກໍໄດ້ມີການແລກປ່ຽນບົດຮຽນຈາກ ປະເທດອາຊຽນ ກໍ່ຄື ປະເທດ ມາເລເຊຍ ແລະ ໄທ. ຜູ້ເຂົ້າຮ່ວມໃນງານດັ່ງກ່າວ ແມ່ນມາຈາກຜູ້ຄຸ້ມຄອງວຽກງານຫຼັກຊັບ, ທະນາຄານກາງ, ທະນາຄານພັດທະນາອາຊີ, ຕະຫຼາດຫຼັກຊັບ, ອົງການຈັດຕັ້ງສາກົນ, ບໍລິສັດຈົດທະບຽນ, ສະຖາບັນສື່ກາງດ້ານຫຼັກຊັບ ແລະ ຜູ້ມີສ່ວນຮ່ວມໃນຕະຫຼາດທຶນ ຈາກທັງພາຍໃນ ແລະ ຕ່າງປະເທດ.