ໃນວັນທີ 22 ຕຸລາ 2024, ສໍານັກງານຄະນະກໍາມະການຄຸ້ມຄອງຫຼັກຊັບ ໃນນາມປະທານຄະນະກໍາມະການພັດທະນາຕະຫຼາດທຶນອາຊຽນ (ASEAN Capital Markets Forum: ACMF) ໃນປີ 2024 ຮ່ວມກັບ ACMF ແລະ ທະນາຄານພັດທະນາອາຊີ ໄດ້ຈັດງານສະເຫຼີມສະຫຼອງການສ້າງຕັ້ງ ACMF ຄົບຮອບ 20 ປີ ແລະ ກອງປະຊຸມສາກົນ ACMF ປະຈໍາປີ 2024 ຢູ່ທີ່ໂຮງແຮມແລນມາກ, ນະຄອນຫຼວງວຽງຈັນ ເຊິ່ງໃຫ້ກຽດເຂົ້າຮ່ວມ ແລະ ກ່າວມີຄໍາເຫັນໂດຍ ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີແຫ່ງ ສປປ ລາວ, ປະທານຄະນະກໍາມະການຄຸ້ມຄອງຫຼັກຊັບ ໂດຍມີຜູເຂົ້າຮ່ວມຫຼາຍກວ່າ 200 ທ່ານ ເປັນຕົ້ນແມ່ນ ຄະນະນໍາຈາກປະເທດສະມາຊິກ ACMF, ຕະຫຼາດຫຼັກຊັບ, ທະນາຄານກາງ, ກອງເລຂາອາຊຽນ, ທະນາຄານພັດທະນາອາຊີ, ອົງການຈັດຕັ້ງສາກົນ ແລະ ຜູ້ມີສ່ວນຮ່ວມໃນຕະຫຼາດທຶນ ຈາກທັງພາຍໃນ ແລະ ຕ່າງປະເທດ.

ງານດັ່ງກ່າວ ຈັດຂຶ້ນພາຍໃຕ້ຫົວຂໍ້ ”ACMF ຄົບຮອບ 20 ປີ: ສົ່ງເສີມການຂະຫຍາຍຕົວພາຍໃນພາກພື້ນໂດຍການເພີ່ມທະວີການເຊື່ອມຈອດ, ຄວາມຍືນຍົງ ແລະ ຄວາມເຂັ້ມແຂງໃນຕະຫຼາດທຶນອາຊຽນ (The ACMF at 20: Facilitating the Growth of the Region through Enhancing Connectivity, Sustainability and Resilience across the ASEAN Capital Markets)” ຊຶ່ງຈັດຂຶ້ນເພື່ອເປັນການສະເຫຼີມສະຫຼອງຜົນສໍາເລັດ ແລະ ວິວັດທະນາການຂອງການພັດທະນາຕະຫຼາດທຶນໃນອາຊຽນ ຕະຫຼອດໄລຍະ 20 ປີ ທີ່ຜ່ານມາ ເພື່ອສະແດງໃຫ້ເຫັນເຖິງຄວາມພະຍາຍາມຢ່າງຕໍ່ເນື່ອງຂອງ ACMF ໃນການຈັດຕັ້ງປະຕິບັດບັນດາຂໍ້ລິເລີ່ມ, ການພັດທະນາ ແລະ ການຂັບເຄື່ອນຕະຫຼາດທຶນອາຊຽນໄປສູ່ລວງເລິກ ແລະ ມີສະພາບຄ່ອງ, ເປັນຊ່ອງທາງລະດົມທຶນໄລຍະຍາວ ແລະ ສາມາດເຊື່ອມໂຍງກັນໄດ້. ພາຍໃນງານ ຕາງໜ້າຈາກປະເທດສະມາຊິກ ACMF ໄດ້ຂຶ້ນກ່າວຕໍ່ວິໄສທັດການພັດທະນາຕະຫຼາດທຶນ, ຜົນສໍາເລັດ ແລະ ທິດທາງການຮ່ວມມືຕະຫຼາດທຶນອາຊຽນໃນຕໍ່ໜ້າ ເພື່ອພ້ອມກັນກ້າວໄປສູ່ການພັດທະນາແບບຍືນຍົງ. ພ້ອມດຽວກັນນັ້ນ, ກໍ່ໄດ້ມີການແລກປ່ຽນຄວາມຮູ້ ແລະ ປະສົບການ ກັບຜູ້ມີສ່ວນຮ່ວມໃນຕະຫຼາດທຶນ ພາຍໃຕ້ຫົວຂໍ້: ຈາກແຜນຍຸດທະສາດສູ່ການຈັດຕັ້ງປະຕິບັດຕົວຈິງ ໃນປີ 2021-2025 ແລະ ໃນຕໍ່ໜ້າ, ການຂັບເຄື່ອນຕະຫຼາດທຶນສູ່ຄວາມຍືນຍົງ ແລະ ການຈັດຕັ້ງປະຕິບັດການລາຍງານການເປີດເຜີຍຂໍ້ມູນຍືນຍົງຂອງວິສາຫະກິດ ເພື່ອຍົກໃຫ້ເຫັນເຖິງຄວາມສໍາຄັນ ແລະ ຈໍາເປັນ ໃນການຂັບເຄື່ອນຕະຫຼາດທຶນອາຊຽນໃຫ້ຍືນຍົງ ໂດຍຜ່ານຄວາມເຂັ້ມແຂງຂອງການພັດທະນາຕະຫຼາດທຶນໃນແຕ່ລະປະເທດອາຊຽນ ເພື່ອໃຫ້ກາຍເປັນແຫຼ່ງລະດົມທຶນໄລຍະຍາວຢ່າງແທ້ຈິງ, ໝັ້ນຄົງ, ໂປ່ງໃສ ແລະ ຍຸດຕິທໍາ.