ສຳນັກງານຄະນະກໍາມະການຄຸ້ມຄອງຫຼັກຊັບ ໄດ້ສໍາເລັດການເປັນປະທານຈັດກອງປະຊຸມການພັດທະນາຕະຫຼາດທຶນອາຊຽນ (ASEAN Capital Market Forum: ACMF) ຄັ້ງທີ 41

ໃນວັນທີ 21 ຕຸລາ 2024 ທີ່ ນະຄອນຫຼວງວຽງຈັນ ຊຶ່ງ ສປປ ລາວ ກໍຄື ສໍານັກງານຄະນະກໍາມະການຄຸ້ມຄອງຫຼັກຊັບ (ສຄຄຊ) ໄດ້ຮັບກຽດເປັນເຈົ້າພາບພາຍໃຕ້ການເປັນປະທານອາຊຽນ 2024 ຂອງ ສປປ ລາວ ພ້ອມດຽວກັນນີ້ ປີ 2024 ກໍ່ເປັນປີສະເຫຼີມສະຫຼອງຄົບຮອບ 20 ປີ (2004-2024) ຂອງການສ້າງຕັ້ງ ACMF. ກອງປະຊຸມຄັ້ງນີ້ ເປັນປະທານໂດຍ ທ່ານ ນາງ ແພງສີ ແພງເມືອງ, ຫົວໜ້າ ສຄຄຊ ແລະ ເປັນຮອງປະທານກອງປະຊຸມໂດຍ ທ່ານ Mohammad Faiz Azmi ປະທານຄະນະກໍາມະການຄຸ້ມຄອງຫຼັກຊັບມາເລເຊຍ. ພ້ອມນີ້ ກໍ່ມີຕາງໜ້າຜູ້ຄຸ້ມຄອງຫຼັກຊັບຈາກ 10 ປະເທດສະມາຊິກອາຊຽນ, ກອງເລຂາອາຊຽນ, ທະນາຄານພັດທະນາອາຊີ ແລະ ສະຖາບັນການເງິນຍືນຍົງອາຊີ ເຂົ້າຮ່ວມ. ຈຸດປະສົງຂອງກອງປະຊຸມແມ່ນ ເພື່ອປຶກສາຫາລື ແລະ ຕົກລົງບັນຫາ ກ່ຽວກັບການພັດທະນາ ແລະ ການເຊື່ອມໂຍງຕະຫຼາດທຶນໃນຂົງເຂດອາຊຽນ. ກອງປະຊຸມ ໄດ້ຮັບຟັງການລາຍງານ, ປຶກສາຫາລື ແລະ ມີມະຕິຕົກລົງເປັນເອກະພາບຕໍ່ກັບບັນຫາຕ່າງໆ ຕິດພັນກັບວຽກງານຂອງແຕ່ລະໜ່ວຍງານຄົ້ນຄວ້າ ໃນຂອບ ACMF ເປັນຕົ້ນແມ່ນ: ຮັບຟັງການລາຍງານຄວາມຄືບໜ້າໃນການຈັດຕັ້ງປະຕິບັດວຽກງານ ແລະ ປຶກສາຫາລືກ່ຽວກັບວຽກງານການເປີດເຜີຍຂໍ້ມູນຍືນຍົງ, ການອອກຈໍາໜ່າຍໜ່ວຍລົງທຶນຂ້າມແດນ, ການເງິນຍືນຍົງ, ການຄຸ້ມຄອງບໍລິຫານ ແລະ ການຄຸ້ມຄອງຊັບສິນດິຈິຕອນ, ການທົບທວນ ACMF Action Plan (2021-2025) ແລະ ສ້າງແຜນ (2026-2030). ພ້ອມນີ້, ກອງປະຊຸມກໍ່ໄດ້ຮັບຟັງການລາຍງານກ່ຽວກັບຜົນຂອງກອງປະຊຸມອາຊຽນ ແລະ ກອງປະຊຸມປິ່ນອ້ອມ, ການຈັດຕັ້ງປະຕິບັດແຜນງານຂອງປະຊາຄົມເສດຖະກິດອາຊຽນ (AEC Post-2025 Updates), ການຮ່ວມມືລະຫວ່າງ ອາຊຽນ ແລະ ຂົງເຂດຕ່າງໆ ເຊັ່ນ: ລາຊະອານາຈັກອັງກິດ ແລະ ຍີ່ປຸ່ນ, ລາຍງານຄວາມຄືບໜ້າຂອງບັນດາໂຄງການຊ່ວຍເຫຼືອທາງດ້ານວິຊາການຂອງທະນາຄານພັດທະນາອາຊີ ໃຫ້ແກ່ ACMF.

ນອກຈາກນີ້, ສຄຄຊ ໃນນາມກອງເລຂາ ACMF ໄດ້ນໍາສະເໜີການກະກຽມຈັດງານສະເຫຼີມສະຫຼອງຄົບຮອບ 20 ປີ ຂອງ ACMF, ກອງປະຊຸມສາກົນຂອງ ACMF ແລະ ຄວາມຄືບ ໜ້າຂອງການຮ່າງປຶ້ມ 20 ປີ ການດໍາເນີນງານຂອງ ACMF ເພື່ອສັງລວມຜົນສໍາເລັດຂອງ ACMF ໃນໄລຍະ 2 ທົດສະວັດທີ່ຜ່ານມາ. ຜ່ານການລາຍງານ ແລະ ປຶກສາຫາລື, ກອງປະຊຸມໄດ້ຮັບຮອງບັນຫາສໍາຄັນເປັນຕົ້ນແມ່ນ ຮັບຮອງເອົາບົດແນະນໍາການເງິນໃນໄລຍະຂ້າມຜ່ານຂອງອາຊຽນ (ASEAN Transition Finance Guidance: ATFG) ສະບັບທີ 2, ຮັບຊາບຕໍ່ການເປີດຕົວຂອງໂຄງການຮ່ວມມືອາຊຽນ-ຍີ່ປຸ່ນ ຫຼື Asia Green Transformation Consortium (Asia GX Consortium) ຢູ່ປະເທດ ຍີ່ປຸ່ນ ໃນວັນທີ 2 ຕຸລາ 2024 ທີ່ຜ່ານມາ, ຮັບຊາບຕໍ່ຄວາມຄືບໜ້າໃນການພັດທະນາຕະຫຼາດກາກບອນແບບສະໝັກໃຈ (Voluntary Carbon Market: VCM) ແລະ ການພັດທະນາ ASEAN Taxonomy ສະບັບທີ 4 ແລະ ຮັບຊາບຜົນການປະເມີນແຜນ ACMF Action Plan 2021-2025 ແລະ ການພັດທະນາ ACMF Action Plan 2026-2030. ຄຽງຄູ່ກັນນີ້, ກອງປະຊຸມ ໄດ້ສະແດງຄວາມຂອບໃຈ ມາຍັງບັນດາປະເທດສະມາຊິກອາຊຽນ ທີ່ໄດ້ໃຫ້ການສະໜັບສະໜູນ ແລະ ເອົາໃຈໃສ່ໃນການຈັດຕັ້ງປະຕິບັດວຽກງານການພັດທະນາ ແລະ ການເຊື່ອມໂຍງວຽກງານຕະຫຼາດທຶນໃນຂົງເຂດອາຊຽນ.

ນອກນັ້ນ, ກໍຂໍສະແດງຄວາມຂອບໃຈມາຍັງ ບັນດາຄູ່ຮ່ວມພັດທະນາ ແລະ ຜູ້ມີສ່ວນຮ່ວມທັງໝົດ ເປັນຕົ້ນແມ່ນ ກອງເລຂາອາຊຽນ, ທະນາຄານພັດທະນາອາຊີ ແລະ ສະຖາບັນການເງິນຍືນຍົງອາຊີ ທີ່ໄດ້ສືບຕໍ່ໃຫ້ການຮ່ວມມື ແລະ ໃຫ້ການຊ່ວຍເຫຼືອທາງດ້ານວິຊາການ ແລະ ທຶນຮອນເຂົ້າໃນການພັດທະນາວຽກງານຂອງ ACMF ດ້ວຍດີຕະຫຼອດມາ ຊຶ່ງເຮັດໃຫ້ໂຄງການລິເລີ່ມຕ່າງໆຂອງ ACMF ມີຜົນສໍາເລັດຢ່າງຈົບງາມ. ໃນທ້າຍຂອງກອງປະຊຸມໃນຄັ້ງນີ້ ແມ່ນໄດ້ສົ່ງມອບການເປັນປະທານ ACMF ປີ 2025 ໃຫ້ແກ່ ຄະນະກໍາມະການຄຸ້ມຄອງຫຼັກຊັບມາເລເຊຍ ແລະ ເປັນຮອງປະທານ ACMF ໂດຍ ຄະນະກໍາມະການຄຸ້ມຄອງຫຼັກຊັບຟິລິປິນ.

ສຳລັບເນື້ອໃນບົດຂ່າວສະບັບພາສາອັງກິດ ຕາມລິ້ງ: