ໃນວັນທີ 15 ມີນາ 2024 ທີ່ ນະຄອນຫຼວງພະບາງ, ສປປ ລາວ, ກອງປະຊຸມຄະນະກໍາມະການຕະຫຼາດທຶນອາຊຽນ (ASEAN Capital Market Forum: ACMF) ຄັ້ງທີ 40 ໄດ້ໄຂຂຶ້ນຢ່າງເປັນທາງການ ພາຍໃຕ້ການເປັນປະທານອາຊຽນ 2024 ຂອງ ສປປ ລາວ ພ້ອມນີ້ ປີ 2024 ກໍ່ເປັນປີຄົບຮອບ 20 ປີ ຂອງການສ້າງຕັ້ງ ACMF . ກອງປະຊຸມຄັ້ງນີ້ ເປັນປະທານໂດຍ ສໍານັກງານຄະນະກໍາມະການຄຸ້ມຄອງຫຼັກຊັບ ສປປ ລາວ ໃນນາມປະທານ ACMF ແລະ ຄະນະກໍາມະການຄຸ້ມຄອງຫຼັກຊັບ ມາເລເຊຍ ໃນນາມຮອງປະທານ ACMF ພ້ອມນັ້ນ ກໍມີຜູ້ເຂົ້າຮ່ວມຈາກບັນດາ 10 ປະເທດສະມາຊິກອາຊຽນ, ກອງເລຂາອາຊຽນ (ASEC: ASEAN Secretariat), ທະນາຄານພັດທະນາອາຊີ (ADB: Asia Development Bank) ແລະ ສະຖາບັນການເງິນຍືນຍົງອາຊຽນ (SFIA: Sustainable Finance Institute Asia). ກອງປະຊຸມ ໄດ້ຮັບຟັງການລາຍງານ, ປຶກສາຫາລື ແລະ ມີມະຕິຕົກລົງຮັບຮອງເອົາຫຼາຍບັນຫາ ຕິດພັນກັບວຽກງານຂອງແຕ່ລະໜ່ວຍງານຄົ້ນຄວ້າ ໃນຂອບ ACMF ເປັນຕົ້ນແມ່ນ

ລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານຕາມ ACMF Roadmap ໃນການພັດທະນາຕະຫຼາດທຶນແບບຍືນຍົງຂອງອາຊຽນ ປີ 2020-2025 ຂອງໜ່ວຍງານຄົ້ນຄວ້າການເງິນຍືນຍົງ ທີ່ຄາດວ່າໃນປີ 2024 ຈະມີຜົນສໍາເລັດ 90% ຕາມແຜນການເຄື່ອນໄຫວວຽກງານທີ່ວາງໄວ້. ພ້ອມດຽວກັນນີ້, ກໍ່ຄາດວ່າຈະເລີ່ມປະເມີນແຜນປະຕິບັດງານ (ACMF Action Plan) ປີ 2021-2025 ແລະ ການພັດທະນາແຜນ ປະຕິບັດງານດັ່ງກ່າວ ປີ 2026-2030. ນອກນີ້, ພາຍໃຕ້ ມາດຕະຖານພັນທະບັດສີຂຽວ, ສັງຄົມ, ແລະ ຍືນຍົງຂອງອາຊຽນ ທີ່ໄດ້ກໍານົດ ໃນປີ 2017 ແລະ 2018 ກໍ່ໄດ້ມີການອອກພັນທະບັດດັ່ງກ່າວ ມູນຄ່າ 47,46 ຕື້ໂດລາສະຫະລັດ (ຂໍ້ມູນໃນວັນທີ 12 ກຸມພາ 2024);

ລາຍງານຄວາມຄືບໜ້າການພັດທະນາການຈັດໝວດກິດຈະກໍາສີຂຽວຂອງອາຊຽນ (ASEAN Taxonomy) ເພື່ອການເງິນຍືນຍົງ ແມ່ນໄດ້ຮັບຜົນຕອບຮັບໃນທາງບວກຈາກການປຶກສາຫາລືກັບພາກສ່ວນກ່ຽວຂ້ອງ ສໍາລັບສະບັບທີ 2 ພ້ອມດຽວກັນນີ້, ທີ່ປະຊຸມກໍ່ເຫັນດີໃຫ້ມີການສືບຕໍ່ວຽກງານຂອງຄະນະກໍາມະການຄົ້ນຄວ້າການຈັດໝວດກິດຈະກໍາສີຂຽວຂອງອາຊຽນ (ATB: ASEAN Taxonomy Board) ລວມທັງ ການພັດທະນາ ASEAN Taxonomy ສະບັບທີ 3. ພ້ອມທັງ ເຫັນດີແຕ່ງຕັ້ງ ທະນາຄານກາງບຣູໄນ (BDCB) ແລະ ຄະນະກຳມະການຫຼັກຊັບ ມາເລເຊຍ (SCM) ເປັນຜູ້ຕາງໜ້າຂອງ ACMF ເພື່ອປະກອບເຂົ້າເປັນສະມາຊິກຂອງ ATB ໃນວັນທີ 31 ມີນາ 2024 – 30 ມີນາ 2026;

ລາຍງານຄວາມຄືບໜ້າຂອງການພັດທະນາບົດແນະນໍາການເງິນໃນໄລຍະຂ້າມຜ່ານຂອງອາຊຽນ (ASEAN Transition Finance Guidance) ທີ່ປະຊຸມໄດ້ຮັບຮອງເອົາການດໍາເນີນການປຶກສາຫາລືກັບບັນດາ ພາກສ່ວນກ່ຽວຂ້ອງ ຕໍ່ກັບບົດແນະນຳການເງິນໄລຍະຂ້າມຜ່ານຂອງອາຊຽນ ສະບັບທີ 1 ພ້ອມທັງ ເຫັນດີສືບຕໍ່ພັດທະນາບົດແນະນໍາການເງິນໄລຍະຂ້າມຜ່ານຂອງອາຊຽນ ສະບັບທີ 2 ໃນປີ 2024;

ສືບຕໍ່ຮ່ວມມືຢ່າງຕໍ່ເນື່ອງກັບ IFRS (International Financial Reporting Standards) ກໍ່ຄື ຄະນະກໍາມະການມາດຕະຖານຄວາມຍືນຍົງສາກົນ (ISSB: International Sustainability Standards Board) ໃນການສົ່ງເສີມການລາຍງານຂໍ້ມູນກ່ຽວກັບຄວາມຍືນຍົງໃນພາກພື້ນ ແລະ ທີ່ປະຊຸມໄດ້ຮັບຮອງເອົາແຜນວຽກ ປະຈໍາປີ 2024 ເພື່ອສ້າງຄວາມອາດສາມາດໃນການລາຍງານຂໍ້ມູນກ່ຽວກັບຄວາມຍືນຍົງ ນອກນີ້ ກໍ່ໄດ້ຮັບຊາບຕໍ່ການສ້າງ Sustainability Innovation Lab ທີ່ ISSB ແລະ Global Reporting Initiative (GRI) ໄດ້ເຮັດວຽກຮ່ວມກັນ ເພື່ອສ້າງຄວາມອາດສາມາດໃຫ້ແກ່ພາກພື້ນ ໃນການລາຍງານຂໍ້ມູນກ່ຽວກັບຄວາມຍືນຍົງ ໂດຍສະເພາະແມ່ນ ບໍລິສັດທີ່ມີການລາຍງານໃຫ້ຫຼາຍພາກສ່ວນ;

ຮັບຮອງການພັດທະນາບົດແນະນຳກ່ຽວກັບຂໍ້ກຳນົດໃນການເປີດເຜີຍຂໍ້ມູນ ສໍາລັບການອອກຈໍາໜ່າຍ ແລະ ຈົດທະບຽນຫຼັກຊັບຂ້າມແດນຂອງອາຊຽນ;

ສືບຕໍ່ຂໍ້ລິເລີ່ມໃນການສ້າງຄວາມອາດສາມາດ ແລະ ຊຸກຍູ້ການຮ່ວມມື ໂດຍຜ່ານໂຄງການພັດທະນາຕະຫຼາດທຶນອາຊຽຂອງ ACMF ຊຶ່ງລວມມີໂຄງການຝຶກອົບຮົບ ແລະ ການຝຶກອົບຮົມສ້າງຄວາມອາດສາມາດ ໃຫ້ແກ່ພະນັກງານຂອງສະມາຊິກ ACMF ພ້ອມທັງ ການຮ່ວມມືກັບພາກສ່ວນພາຍນອກ ແລະ ຜູ້ຊ່ຽວຊານດ້ານວິຊາສະເພາະ;

ລາຍງານການປັບປຸງການປະເມີນການຈັດຕັ້ງປະຕິບັດການຄຸ້ມຄອງບໍລິຫານຂອງບໍລິສັດຈົດທະບຽນໃນອາ ຊຽນ (ACGS: ASEAN Corporate Governance Scorecard) ໃນປີ 2024 ແລະ ຄາດວ່າຈະປະກາດຜົນການປະເມີນ ໃນປີ 2025;

ສືບຕໍ່ການແລກປ່ຽນປະສົບການກ່ຽວກັບຊັບສິນດິຈິຕອນ (Digital Assets) ຂອງສະມາຊິກອາຊຽນ. ຊຶ່ງ ຄະນະກໍາມະການຄຸ້ມຄອງຫຼັກຊັບ ສິງກະໂປ ໄດ້ລາຍງານຄວາມຄືບໜ້າຂອງການປັບປຸງລະບຽບການ ໃນການບໍລິການຊໍາລະເງິນດິຈິຕອນໃນສິງກະໂປ ນອກນີ້, ຄະນະກໍາມະການຄຸ້ມຄອງຫຼັກຊັບ ມາເລເຊຍ ກໍ່ໄດ້ລາຍງານຄວາມຄືບໜ້າການພັດທະນາຕະຫຼາດຊັບສິນດິຈິຕອນ ໃນປະເທດມາເລເຊຍ;

ນະໂອກາດນີ້, ACMF ກໍ່ໄດ້ສະແດງຄວາມຂອບໃຈຢ່າງຍິ່ງຕໍ່ທະນາຄານພັດທະນາອາຊີ (ADB) ທີ່ໄດ້ໃຫ້ການສະໜັບສະໜູນຢ່າງສະເໜີມາ ຕະຫຼອດໄລຍະເວລາ 20 ປີ ໂດຍຜ່ານການຊ່ວຍເຫຼືອດ້ານ ວິຊາການ ແລະ ການໃຫ້ຄຳແນະນຳຈາກຜູ້ຊ່ຽວຊານ ເພື່ອຊຸກຍູ້ການພັດທະນາຕະຫຼາດທຶນໃນທົ່ວພາກພື້ນ ອາຊຽນ ແລະ ເຊື່ອໝັ້ນວ່າ ADB ຈະສືບຕໍ່ເພີ່ມທະວີການສະໜັບສະໜູນວຽກງານຂອງ ACMF ຕໍ່ໄປ ພ້ອມດຽວກັນນີ້ ກໍ່ໄດ້ຂອບໃຈຕໍ່ສະຖາບັນການເງິນຍືນຍົງອາຊີ (SFIA) ສໍາລັບການສະໜັບສະໜູນ ໃນການພັດທະນາວຽກງານຄວາມຍືນຍົງຂອງ ACMF ມີຄວາມກ້າວໜ້າ ແລະ ຂະຫຍາຍຕົວຂຶ້ນເລື້ອຍໆ.