ເພື່ອເປັນການຊົມເຊີຍກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ VIII ແລະ ການສະເຫຼີມສະຫຼອງບຸນປີໃໝ່ລາວ (ກຸດສົງການ), ພ້ອມທັງເປັນການສ້າງຄວາມສາມັກຄີຮັກແພງໃຫ້ແໜ້ນແຟ້ນຫຼາຍກວ່າເກົ່າ. ສຳນັກງານ ຄະນະກຳມະການຄຸ້ມຄອງຫຼັກຊັບ (ສຳນັກງານ ຄຄຊ) ແລະ ກົມທະບຽນ ແລະ ຄຸ້ມຄອງວິສາຫະກິດ (ທຄວ), ກະຊວງອຸດສາຫະກຳ ແລະ ການຄ້າ ໄດ້ຈັດຕັ້ງຂະບວນການແຂ່ງຂັນກິລາບານເຕະມິດຕະພາບຊາຍຂຶ້ນ ໃນວັນທີ 22 ເມສາ 2016 ທີ່ເດີ່ນເຕະບານ ຕົ້ນອະນິລຸດ ເມືອງສີໂຄດຕະບອງ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ. ສຸລິສັກ ທຳນຸວົງ ຮອງຫົວໜ້າ ສຳນັກງານ ຄຄຊ ແລະ ທ່ານ ດຣ. ສົມພວງ ພຽນພິນິດ ຫົວໜ້າກົມ ທຄວ, ພ້ອມດ້ວຍຄະນະ ແລະ ພະນັກງານ ທັງ 2 ພາກສ່ວນເຂົ້າຮ່ວມດ້ວຍບັນຍາກາດທີ່ເຕັມໄປດ້ວຍສຽງກອງເຊຍຢ່າງມ່ວນຊື່ນ ແລະ ຟົດຟື້ນ.

ການແຂ່ງຂັນກິລາແມ່ນດຳເນີນໄປດ້ວຍບັນຍາກາດຟົດຟື້ນ, ຮູ້ແພ້ຮູ້ຊະນະ, ຕ່າງຝ່າຍຕ່າງສ້າງບັນຍາກາດ ແລະ ຫຼິ້ນດ້ວຍນ້ຳໃຈນັກກິລາ. ສຳລັບຜົນການແຂ່ງຂັນແມ່ນ ທີມບານເຕະຊາຍ ທຄວ ເອົາຊະນະ ທີມສຳນັກງານ ຄຄຊ ດ້ວຍຄະແນນ 6 ຕໍ່ 4.

ໃນການແຂ່ງຂັນກິລາຄັ້ງນີ້ ທັງສອງຝ່າຍໄດ້ແລກປ່ຽນທຸງກິລາ, ແລະ ຊໍ່ດອກໄມ້, ພ້ອມນັ້ນ ມີພາເຂົ້າສາມັກຄີຮ່ວມກັນ ເພື່ອເປັນການຮັດແໜ້ນຄວາມສາມັກຄີ ແລະ ເຮັດໃຫ້ພະນັກງານທັງສອງຝ່າຍ ກໍ່ຄືສຳນັກງານ ຄຄຊ ແລະ ທຄວ ໄດ້ມີໂອກາດແລກປ່ຽນບົດຮຽນດ້ານວິຊາການນຳ.